കോഴിക്കോട് ∙ കൊയിലാണ്ടിയിൽ അമിതവേഗത്തിൽ പോയ ഓട്ടോറിക്ഷയിൽ നിന്ന് തെറിച്ച് വീണ ഒന്നാം ക്ലാസ് വിദ്യാർഥിക്ക് പരുക്കേറ്റു. കോതമംഗലം ജിഎൽപി സ്കൂൾ ഒന്നാം ക്ലാസ് വിദ്യാർഥി ആരാധ്യയ്ക്കാണ് പരുക്കേറ്റത്. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നു.

 

തിങ്കളാഴ്ച വൈകിട്ട് നാലരയ്ക്ക് സ്കൂൾ വിട്ട് വീട്ടിലേക്ക് പോകും വഴി കുറുവങ്ങാട് സെൻട്രൽ യുപി സ്കൂളിന് സമീപമാണ് അപകടം. കുട്ടിയുടെ കാലിനും കൈക്കും സാരമായ പരുക്കുണ്ട്. വാഹനത്തിൽ നിന്ന് ആറു വയസ്സുകാരി പുറത്തേക്കു വീഴുന്നതും ഇതറിയാതെ ഓട്ടോറിക്ഷ അമിതവേഗത്തിൽ മുന്നോട്ടു പോകുന്നതും ദൃശ്യങ്ങളിൽ വ്യക്തമാണ്. സംഭവത്തിനു പിന്നാലെ കുട്ടിയെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു. ആരോഗ്യനില ഗുരുതരമല്ലെന്ന് ആശുപത്രി വൃത്തങ്ങൾ അറിയിച്ചു.