അസംഘടിത നിർമാണത്തൊഴിലാളി ക്ഷേമനിധി ബോർഡിൽ പേര് റജിസ്റ്റർ ചെയ്യാൻ ഇ–റേഷൻ കാർഡ് ഡൗൺലോഡ് ചെയ്ത മധുര ചിന്നപ്പൂലംപെട്ടി സ്വദേശി തങ്കവേൽ ഞെട്ടി. റേഷൻ കാർഡിൽ ഭാര്യ ജയപ്രിയയുടെ ചിത്രത്തിന്റെ സ്ഥാനത്തുള്ളതു ‘ബീയർ കുപ്പി’.

 

വിവാഹിതയായ മകളുടെ പേര് ഏതാനും ദിവസം മു‍ൻപ് സേവന കേന്ദ്രം വഴി കാർഡിൽനിന്നു നീക്കിയിരുന്നു. തുടർന്നു പുതിയ കാർഡ് എത്തും മുൻപ് താൽക്കാലിക ഇ-റേഷൻ കാർഡ് ഡൗൺലോഡ് ചെയ്തപ്പോഴാണു വിചിത്ര സംഭവം. ബീയർ കുപ്പിയുടെ ചിത്രമുള്ള കാർഡ് സ്വീകരിക്കാനാകില്ലെന്നു പറഞ്ഞ് ക്ഷേമനിധി ബോർഡും കൈമലർത്തി. അതോടെ, റജിസ്ട്രേഷൻ മുടങ്ങി. സംഭവത്തിൽ അധികൃതർക്കു പരാതി നൽകിയിട്ടുണ്ട്.