തിരുവനന്തപുരം ∙ തിരഞ്ഞെടുപ്പിനു മുൻപേ ക്ഷേമ പെൻഷൻ നൽകാൻ സംസ്ഥാന സർക്കാർ. ഏപ്രിൽ മാസത്തെ പെൻഷൻ വിതരണം ഈ മാസം 31 മുതൽ ആരംഭിക്കും. മാർച്ചിലെ ക്ഷേമ പെൻഷൻ ഈ മാസം 25 മുതലാണ് വിതരണം ചെയ്യുന്നത്. വിഷു പ്രമാണിച്ചാണ് പെൻഷൻ നേരത്തേ വിതരണം ചെയ്യാൻ തീരുമാനിച്ചതെന്നാണ് സർക്കാർ വൃത്തങ്ങൾ പറയുന്നത്. ഇതിനാവശ്യമായ തുക അനുവദിച്ച് സർക്കാർ നേരത്തെ തന്നെ ഉത്തരവിറക്കിയിരുന്നു.

 

ഈ മാസം ആകെ 4000 രൂപയാണ് ക്ഷേമ പെൻഷനായി ഓരോ ഗുണഭോക്താവിന്റെയും കൈകളിലെത്തുക. നിലവിൽ പ്രതിമാസം 2000 രൂപ വീതമാണ് ക്ഷേമ പെൻഷനായി നൽകിവരുന്നത്. മാർച്ച് മാസത്തെ ക്ഷേമ പെൻഷൻ വിതരണം ഈ മാസം 25 മുതൽ വിതരണം ചെയ്യും. കഴിഞ്ഞ തദ്ദേശ തിരഞ്ഞെടുപ്പിനു മുൻപായാണ് ക്ഷേമ പെൻഷൻ 400 രൂപ വർധിപ്പിച്ചത്. പെൻഷൻ 2600 രൂപയാക്കുമെന്നായിരുന്നു 2021ലെ നിയമസഭാ തിരഞ്ഞെടുപ്പിൽ എൽഡിഎഫിന്റെ വാഗ്ദാനം.

 

അതിനിടെ, എന്‍ഡിഎ മൂന്നാംഘട്ട സ്ഥാനാര്‍ഥി പട്ടിക പുറത്തുവിട്ടു. തിരുവനന്തപുരം മണ്ഡലത്തില്‍ ജില്ലാ പ്രസിഡന്റ് കരമന ജയനാണ് സ്ഥാനാര്‍ഥി. കോട്ടയം പുതുപ്പള്ളിയില്‍ രവീന്ദ്രനാഥ് വാകത്താനം, പീരുമേട് – വി.രതീഷ്, മാവേലിക്കര (എസ് സി) – അജിമോന്‍, അടൂര്‍ (എസ് സി) – പന്തളം പ്രതാപന്‍, ചവറ-കെ.ആര്‍.രാജേഷ്, ചടയമംഗലം – ആര്‍.എസ്.അരുണ്‍ രാജ്, ചിറയിന്‍കീഴ് (എസ്‌സി) – ബി.എസ്.അനൂപ്, അരുവിക്കര – വിവേക് ഗോപന്‍, കോവളം – ടി.എന്‍.സുരേഷ്, നെയ്യാറ്റിന്‍കര – എസ്.രാജശേഖരന്‍ നായര്‍ എന്നിവരാണ് മറ്റു സ്ഥാനാര്‍ഥികള്‍.

 

ബി.എസ്.അനൂപ്, ആര്‍.എസ്.അരുണ്‍രാജ് എന്നിവര്‍ കോണ്‍ഗ്രസ് വിട്ടെത്തിയവരാണ്. ഇടതു സ്ഥാനാര്‍ഥിയാകാന്‍ ആര്‍ജെഡി വിട്ട് ഐഎസ്‌ജെഡിയില്‍ ചേര്‍ന്ന ആളാണ് ടി.എന്‍.സുരേഷ്.