കോഴിക്കോട് ∙ ഓൺലൈൻ തട്ടിപ്പിലൂടെ മാളിക്കടവ് സ്വദേശിക്ക് നഷ്‌ടമായത് 92 ലക്ഷത്തിലധികം രൂപ. ഓഹരി വിപണിയിൽ നിക്ഷേപിച്ച് അമിതലാഭം നൽകാമെന്നു വാഗ്ദാനം ചെയ്താണ് ഓൺലൈൻ സംഘം പണം തട്ടിയെടുത്തത്. മാർച്ച് പത്തിനും ഈ മാസം നാലിനും ഇടയിലായി, വാട്സാപ് ഗ്രൂപ്പുകൾ കേന്ദ്രീകരിച്ചാണ് 61 കാരനെ കബളിപ്പിച്ചത്.

 

വാട്സാപ് ഗ്രൂപ്പുകളിലൂടെയും വിവിധ ആപ്ലിക്കേഷനുകൾ ഇൻസ്റ്റാൾ ചെയ്യിച്ചും ഓഹരി നിക്ഷേപമെന്ന പേരിൽ ഇദ്ദേഹത്തിന്റെ രണ്ട് ബാങ്ക് അക്കൗണ്ടുകളിൽ നിന്നായി വിവിധ അക്കൗണ്ടുകളിലേക്ക് പണം അയപ്പിച്ചായിരുന്നു തട്ടിപ്പ്. ഇടപാടുകളുടെ വിവരങ്ങൾ ശേഖരിക്കുന്നതിനും പ്രതികളെ കണ്ടെത്തുന്നതിനുമായി കോഴിക്കോട് സൈബർ പൊലീസ് അന്വേഷണം നടത്തുകയാണ്. പരാതിക്കാരനിൽനിന്നു ലഭിച്ച വാട്സാപ് ഗ്രൂപ്പുകളുടെ പേരുകൾ, മൊബൈൽ നമ്പറുകൾ, ഇൻസ്റ്റാൾ ചെയ്യിപ്പിച്ച ആപ്പുകൾ തുടങ്ങിയവ കേന്ദ്രീകരിച്ചാണ് അന്വേഷണം.