പ്രകൃതി കനിഞ്ഞരുളിയ പല ഔഷധസസ്യങ്ങളും പഴവർഗങ്ങളും ഇന്നും നമ്മുടെ തൊടികളിൽ അജ്ഞാതമായി തുടരുന്നുണ്ട്. അത്തരത്തിൽ ഒന്നാണ് ബർമീസ് ഗ്രേപ്പ്. പ്രാദേശികമായി ഒട്ടേറെ പേരുകളിൽ അറിയപ്പെടുന്ന ഈ പഴം വെറുമൊരു നാട്ടുപഴമല്ല, മറിച്ച് പോഷകങ്ങളുടെ കലവറയും കർഷകർക്ക് മികച്ച വരുമാനം നൽകാൻ ശേഷിയുള്ള ഒരു വാണിജ്യവിളയുമാണ്.

 

∙ എന്താണ് ബർമീസ് ഗ്രേപ്പ്?

യൂഫോർബിയേസി സസ്യകുടുംബത്തിൽപ്പെട്ട നിത്യഹരിത മരമാണ് ബർമീസ് ഗ്രേപ്പ്. തെക്കുകിഴക്കൻ ഏഷ്യൻ രാജ്യങ്ങളായ മ്യാൻമർ, തായ്‌ലൻഡ്, വിയറ്റ്നാം, ബംഗ്ലദേശ് എന്നിവടങ്ങളിലാണ് ഇത് പ്രധാനമായും കണ്ടുവരുന്നത്. ഇന്ത്യയിൽ പശ്ചിമ ബംഗാൾ (കൂച്ച് ബെഹാർ, ജൽപായ്ഗുരി, ഡാർജിലിങ്), വടക്കുകിഴക്കൻ സംസ്ഥാനങ്ങൾ എന്നിവിടങ്ങളിൽ ഇത് വ്യാപകമായി കൃഷി ചെയ്യുന്നു. കേരളത്തിലും ബർമീസ് ഗ്രേപ്പ് വളരുമെന്നാണ് അറിയുന്നത്. മരത്തിന്റെ തടിയിലും ശാഖകളിലും കുലകളായി തൂങ്ങിക്കിടക്കുന്ന ഈ പഴങ്ങൾ കാണാൻ ഏറെ മനോഹരമാണ്. വിളയുമ്പോൾ മഞ്ഞനിറമാകുന്ന ഈ പഴത്തിനുള്ളിൽ വെളുത്ത നിറത്തിലുള്ള ഭക്ഷ്യയോഗ്യമായ പൾപ്പ് അടങ്ങിയിരിക്കുന്നു.

 

∙ കൃഷിരീതി

ബർമീസ് ഗ്രേപ്പ് കൃഷി ചെയ്യാൻ വലിയ പ്രയത്നമോ ചെലവോ ആവശ്യമില്ല എന്നതാണ് ഇതിന്റെ ഏറ്റവും വലിയ പ്രത്യേകത. ഉഷ്ണമേഖലാ കാലാവസ്ഥയിൽ ഇത് നന്നായി വളരും. കഠിനമായ വെയിലിനേക്കാൾ ഭാഗികമായ തണലിലും ഈ മരം തഴച്ചുവളരാറുണ്ട്. ഇടവിളയായി കൃഷി ചെയ്യാം. റംബൂട്ടാൻ, മാവ്, ദുരിയാൻ തുടങ്ങി മരങ്ങൾക്കിടയിൽ ഒരു ഇടവിളയായി വളർത്താം. ഇത് കൃഷിയിടത്തിലെ ജൈവവൈവിധ്യം വർധിപ്പിക്കുന്നു. മഴക്കാലത്താണ് സാധാരണയായി ഈ പഴം വിളവെടുക്കുന്നത്. കുറഞ്ഞ പരിചരണത്തിലും മികച്ച വിളവ് നൽകാൻ ഇതിന് സാധിക്കും.

 

∙ ഔഷധഗുണങ്ങളും വിപണി സാധ്യതകളും

പരമ്പരാഗത വൈദ്യശാസ്ത്രത്തിൽ ബർമീസ് ഗ്രേപ്പിന് വലിയ സ്ഥാനമുണ്ട്. മരത്തിന്റെ തൊലി മുതൽ വേരും ഇലയും വരെ ഔഷധഗുണമുള്ളതാണ്. ഇതിന്റെ ഇലകൾക്കും തൊലിക്കും ആന്റി-ഇൻഫ്ലമേറ്ററി ഗുണങ്ങളുണ്ട്. ഇത് വേദന സംഹാരിയായും ഉപയോഗിക്കുന്നു. പഴത്തിലെ സോഡിയം-പൊട്ടാസ്യം ബാലൻസ് രക്തസമ്മർദം നിയന്ത്രിക്കാൻ സഹായിക്കുന്നു. ഇതിന്റെ വിത്തുകളിൽ ഒമേഗ-9 ഫാറ്റി ആസിഡ് ധാരാളമായി അടങ്ങിയിട്ടുണ്ട്. ഇത് ഹൃദയാരോഗ്യത്തിനും സൗന്ദര്യവർധക വസ്തുക്കളുടെ നിർമാണത്തിനും ഉപയോഗിക്കുന്നു. വിത്തുകളിൽ നിന്ന് തുണിത്തരങ്ങൾ ചായം പിടിപ്പിക്കാൻ ഉപയോഗിക്കുന്ന പ്രകൃതിദത്തമായ നിറം നിർമിക്കാനും സാധിക്കും.

 

∙ മൂല്യവർധിത ഉൽപന്നങ്ങളും വരുമാന മാർഗവും

ബർമീസ് ഗ്രേപ്പ് പഴത്തിന് പെട്ടെന്ന് കേടുവരാൻ സാധ്യതയുള്ളതിനാൽ മൂല്യവർധിത ഉൽപന്നങ്ങളാക്കി മാറ്റുന്നത് കർഷകർക്ക് വലിയ ലാഭം നൽകും. ഇതിൽ പ്രകൃതിദത്തമായ ആന്റിഓക്സിഡന്റുകൾ ഉള്ളതിനാൽ മികച്ച ഗുണനിലവാരമുള്ള വൈൻ നിർമിക്കാൻ സാധിക്കും. പഴത്തിന്റെ തൊലിയിൽ പെക്റ്റിൻ അടങ്ങിയിട്ടുള്ളതിനാൽ ജെല്ലി നിർമാണത്തിന് വളരെ അനുയോജ്യമാണ്.

 

പശ്ചിമ ബംഗാളിലെ പ്രാദേശിക വിപണികളിൽ ബർമീസ് ഗ്രേപ്പിന് കിലോയ്ക്ക് 20 മുതൽ 30 രൂപ വരെ വില ലഭിക്കുന്നുണ്ട്. മൂല്യവർധിത ഉൽപന്നങ്ങളാക്കി മാറ്റിയാൽ ഈ വരുമാനം ഇരട്ടിയാക്കാം. നമ്മുടെ വീട്ടുമുറ്റത്തെ ബർമീസ് ഗ്രേപ്പ് കൃഷി വെറുമൊരു വരുമാന മാർഗം മാത്രമല്ല, മറിച്ച് പോഷകാഹാര സുരക്ഷയ്ക്കുള്ള ഒരു വലിയ വഴി കൂടിയാണ്. ശാസ്ത്രീയമായ കൃഷിരീതികളും കൃത്യമായ വിപണന തന്ത്രങ്ങളും അവലംബിച്ചാൽ ഈ ‘അജ്ഞാത ഫലം’ നാളത്തെ വിപണിയിലെ താരം തന്നെയാകും. കുറഞ്ഞ ചെലവിൽ കൂടുതൽ ഗുണം നൽകുന്ന ബർമീസ് ഗ്രേപ്പിനെ നമ്മുടെ കൃഷിയിടങ്ങളിലേക്ക് സ്വാഗതം ചെയ്യേണ്ട സമയം അതിക്രമിച്ചിരിക്കുന്നു.