കോഴിക്കോട് ∙ പണിമുടക്കു ദിനത്തിൽ സ്കൂളിലെത്തിയ അധ്യാപകരെയും വിദ്യാർഥികളെയും പുറത്താക്കി ഗേറ്റുപൂട്ടി കൊടി നാട്ടി സിഐടിയു പ്രവർത്തകർ. കോഴിക്കോട് കോയറോഡ് ജി.എം. യുപിഎസ് സ്കൂളിൽ രാവിലെ 9.45 ഓടെയാണ് സംഭവം. ഗേറ്റു പൂട്ടി സമരക്കാർ മുദ്രാവാക്യം വിളി തുടങ്ങിയതോടെ അധ്യാപകർക്കു റോഡിൽനിൽക്കേണ്ടിവന്നു. ഡയസ്നോൺ പ്രഖ്യാപിച്ചതിനാൽ ശമ്പളം മുടങ്ങുമെന്ന് കരുതിയാണ് ജോലിക്കെത്തിയതെന്നും വിദ്യാഭ്യാസ വകുപ്പിൽ വിവരം അറിയിച്ചതായും അധ്യാപകർ പറഞ്ഞു. തുടർന്ന് സ്ഥലത്ത് എത്തിയ പൊലീസ് ബലം പ്രയോഗിച്ച് സമരക്കാരെ നീക്കുകയാണ്.