ന്യൂഡൽഹി: സുപ്രീം കോടതിയിലെ ജഡ്ജിമാരുടെ എണ്ണം 33-ൽ നിന്ന് 37 ആയി വർദ്ധിപ്പിക്കാനുള്ള സുപ്രധാന നിർദ്ദേശത്തിന് കേന്ദ്ര സർക്കാർ അംഗീകാരം നൽകി. ചീഫ് ജസ്റ്റിസ് ഉൾപ്പെടാതെ ഇതോടെ ജഡ്ജിമാരുടെ എണ്ണം 37 ആകും. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് ഈ തീരുമാനമുണ്ടായത്. ആറ് വർഷത്തിന് ശേഷമാണ് സുപ്രീം കോടതിയുടെ അംഗബലം വർദ്ധിപ്പിക്കാനുള്ള നടപടി കേന്ദ്രം സ്വീകരിക്കുന്നത്. കെട്ടിക്കിടക്കുന്ന കേസുകൾ വേഗത്തിൽ തീർപ്പാക്കുകയും നീതിന്യായ വ്യവസ്ഥയുടെ കാര്യക്ഷമത വർദ്ധിപ്പിക്കുകയുമാണ് ഈ നീക്കത്തിലൂടെ സർക്കാർ ലക്ഷ്യമിടുന്നത്.

 

 

നിലവിൽ സുപ്രീം കോടതിയിൽ 92,000-ത്തിലധികം കേസുകൾ വിധി കാത്തുനിൽക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. ഈ പ്രതിസന്ധി പരിഹരിക്കുന്നതിനായി ‘സുപ്രീം കോടതി (ജഡ്ജിമാരുടെ എണ്ണം) ഭേദഗതി ബിൽ, 2026’ പാർലമെന്റിൽ അവതരിപ്പിക്കാൻ മന്ത്രിസഭ അനുമതി നൽകി. ഭരണഘടനയുടെ ആർട്ടിക്കിൾ 124(1) പ്രകാരം, പാർലമെന്റിന് നിയമനിർമ്മാണത്തിലൂടെ സുപ്രീം കോടതിയിലെ ജഡ്ജിമാരുടെ എണ്ണം നിശ്ചയിക്കാൻ അധികാരമുണ്ട്. 1956-ലെ സുപ്രീം കോടതി (ജഡ്ജിമാരുടെ എണ്ണം) നിയമത്തിൽ ഭേദഗതി വരുത്തിക്കൊണ്ടാണ് പുതിയ അംഗബലം പ്രാബല്യത്തിൽ വരിക.

 

സുപ്രീം കോടതിയിൽ കാലാനുസൃതമായി ജഡ്ജിമാരുടെ എണ്ണത്തിൽ മാറ്റങ്ങൾ വരുത്തിയിട്ടുണ്ട്. 1956-ൽ നിയമം നടപ്പിലാക്കുമ്പോൾ ചീഫ് ജസ്റ്റിസിനെ കൂടാതെ 10 ജഡ്ജിമാരായിരുന്നു ഉണ്ടായിരുന്നത്. ഇത് പിന്നീട് 1960-ൽ 13 ആയും, 1977-ൽ 17 ആയും വർദ്ധിപ്പിച്ചു. 1986-ൽ അംഗബലം 25 ആയും, 2008-ൽ 30 ആയും ഉയർത്തുകയുണ്ടായി. ഏറ്റവും ഒടുവിലായി 2019-ലാണ് സുപ്രീം കോടതി ജഡ്ജിമാരുടെ എണ്ണം 30-ൽ നിന്ന് 33 ആയി പാർലമെന്റ് വർദ്ധിപ്പിച്ചത്. കേസുകളുടെ എണ്ണത്തിലുണ്ടാകുന്ന വർദ്ധനവിനനുസരിച്ച് നീതിന്യായ വ്യവസ്ഥയെ സജ്ജമാക്കാൻ ഓരോ കാലഘട്ടത്തിലും സർക്കാരുകൾ ഇത്തരം നടപടികൾ സ്വീകരിച്ചിട്ടുണ്ട്.