മറയൂർ∙ ആനക്കാൽപെട്ടി ചിന്നവരയിൽ കനാലിലൂടെ ഒഴുകിവന്ന മൂർഖൻ പാമ്പ്, അലക്കിക്കൊണ്ടിരുന്ന സ്ത്രീയുടെ കാലിൽ ചുറ്റി. ചിന്നവര സ്വദേശി പ്രേമ രാജുവിന്റെ കാലിലാണ് മൂർഖൻ ചുറ്റിയത്. കാലിൽ വള്ളി ചുറ്റുന്നതുപോലെ തോന്നിയതിനെ തുടർന്ന് നോക്കിയപ്പോഴാണ് മൂർഖൻ ചുറ്റി കിടക്കുന്നതു കണ്ടത്. ഉടൻ കനാലിൽനിന്ന് കയറിയതോടെ മൂർഖൻ പിടിവിട്ട് സമീപത്തെ ആൾത്താമസം ഇല്ലാത്ത വീടിന്റെ അടിത്തറയിലെ കല്ലിനിടയിൽ കയറി. സമീപത്തുണ്ടായിരുന്നവർ ഉടൻതന്നെ വനം വകുപ്പിന് വിവരം അറിയിച്ചതിനെ തുടർന്ന് മറയൂരിൽ നിന്ന് ആർആർടി സംഘമെത്തി പാമ്പിനെ പിടികൂടി ചിന്നാർ വനത്തിൽ തുറന്നു വിട്ടു.